Κεφάλαιο 1

Κεφάλαιο 1

1.1 Πολυμερῶς καὶ πολυτρόπως πάλαι ὁ θεὸς λαλήσας τοῖς πατράσιν ἐν τοῖς προφήταις 1.2 ἐπ΄ ἐσχάτου τῶν ἡμερῶν τούτων ἐλάλησεν ἡμῖν ἐν υἱῷ͵ ὃν ἔθηκεν κληρονόμον πάντων͵ δι΄ οὗ καὶ ἐποίησεν τοὺς αἰῶνας· 1.3 ὃς ὢν ἀπαύγασμα τῆς δόξης καὶ χαρακτὴρ τῆς ὑποστάσεως αὐτοῦ͵ φέρων τε τὰ πάντα τῷ ῥήματι τῆς δυνάμεως αὐτοῦ͵ καθαρισμὸν τῶν ἁμαρτιῶν ποιησάμενος ἐκάθισεν ἐν δεξιᾷ τῆς μεγαλωσύνης ἐν ὑψηλοῖς͵ 1.4 τοσούτῳ κρείττων γενόμενος τῶν ἀγγέλων ὅσῳ διαφορώτερον παρ΄ αὐτοὺς κεκληρονόμηκεν ὄνομα. 1.5 Τίνι γὰρ εἶπέν ποτε τῶν ἀγγέλων͵ Υἱός μου εἶ σύ͵ ἐγὼ σήμερον γεγέννηκά σε; καὶ πάλιν͵ Ἐγὼ ἔσομαι αὐτῷ εἰς πατέρα͵ καὶ αὐτὸς ἔσται μοι εἰς υἱόν; 1.6 ὅταν δὲ πάλιν εἰσαγάγῃ τὸν πρωτότοκον εἰς τὴν οἰκουμένην͵ λέγει͵ Καὶ προσκυνησάτωσαν αὐτῷ πάντες ἄγγελοι θεοῦ. 1.7 καὶ πρὸς μὲν τοὺς ἀγγέλους λέγει͵ Ὁ ποιῶν τοὺς ἀγγέλους αὐτοῦ πνεύματα͵ καὶ τοὺς λειτουργοὺς αὐτοῦ πυρὸς φλόγα· 1.8 πρὸς δὲ τὸν υἱόν͵ Ὁ θρόνος σου͵ ὁ θεός͵ εἰς τὸν αἰῶνα τοῦ αἰῶνος͵ καὶ ἡ ῥάβδος τῆς εὐθύτητος ῥάβδος τῆς βασιλείας σου. 1.9 ἠγάπησας δικαιοσύνην καὶ ἐμίσησας ἀνομίαν· διὰ τοῦτο ἔχρισέν σε ὁ θεός͵ ὁ θεός σου͵ ἔλαιον ἀγαλλιάσεως παρὰ τοὺς μετόχους σου· 1.10 καί͵ Σὺ κατ΄ ἀρχάς͵ κύριε͵ τὴν γῆν ἐθεμελίωσας͵ καὶ ἔργα τῶν χειρῶν σού εἰσιν οἱ οὐρανοί· 1.11 αὐτοὶ ἀπολοῦνται͵ σὺ δὲ διαμένεις· καὶ πάντες ὡς ἱμάτιον παλαιωθήσονται͵ 1.12 καὶ ὡσεὶ περιβόλαιον ἑλίξεις αὐτούς͵ ὡς ἱμάτιον καὶ ἀλλαγήσονται· σὺ δὲ ὁ αὐτὸς εἶ καὶ τὰ ἔτη σου οὐκ ἐκλείψουσιν. 1.13 πρὸς τίνα δὲ τῶν ἀγγέλων εἴρηκέν ποτε͵ Κάθου ἐκ δεξιῶν μου ἕως ἂν θῶ τοὺς ἐχθρούς σου ὑποπόδιον τῶν ποδῶν σου; 1.14 οὐχὶ πάντες εἰσὶν λειτουργικὰ πνεύματα εἰς διακονίαν ἀποστελλόμενα διὰ τοὺς μέλλοντας κληρονομεῖν σωτηρίαν;